07. september 2008

Góðu rennarar! Góðu fyrireikarar! Góðu áskoðarar!

Góðu rennarar! Góðu fyrireikarar! Góðu áskoðarar!

Tað, sum vit øll somul júst nú eru vitni til, er eina søguliga løtu. Fyri fyrstu ferð verða tvær stórar renningar hildnar saman, so hetta – í orðsins sanna týdningi – er ein “samanrenning” av Fólkaheilsurenningini og kapprenningini Tórshavn Marathon.

Hetta er fimta árið á rað, at skipað verður fyri fólkaheilsurenning, og sjeyndu ferð at Tórshavn Marathon er á skránni, og tað í sjálvum sær er ein undirstriking av, at renningin er blivin ein náttúrligur partur av gerandislívinum hjá alt fleiri føroyingum.

Henda stóra mannamúgva, sum her er til staðar, ber boð um hetta, og hóast hvør í sínum lagi hevur persónlig mál, so eiga vit øll eitt til felags: Vit renna, tí vit halda tað vera stuttligt, og tí vit vita, at tað er bæði heilsugott og gagnligt at renna.

Tankin aftan fyri Fólkaheilsurenningina fyri børn og vaksin er at betra um fólkaheilsuna hjá føroyingum, og endamálið er eisini at fáa so nógv fólk við sum gjørligt, so hesin heilsubati verður meira sjónligur og fær størri undirtøku.

At rørsla er góð fyri heilsuna, vita vit øll, og tí er eisini umráðandi, at ljós verður varpað á eitt tiltak sum hetta, tí tað kann vera við til at broyta hugburð og gera enn fleiri greið yvir, hvussu stóran týdning tað hevur at røra seg.

Øll fegnast vit um eitt vælvirkandi vælferðarsamfelag, og fremsta treytin fyri at røkka tí er ein góð fólkaheilsa, sum als ikki er nøkur sjálvfylgja nú á døgum, tá alsamt fleiri sjúkur beinleiðis eru avleiðingar av okkara livihátti.

At tað so í ár er lagt soleiðis til rættis, at Fólkaheilsurenningin og Tórshavn Marathon eru sama dag, sama stað og samstundis, er eitt frálíkt hugskot, ið bæði kann vera mennandi fyri fólkaheilsuna og frælsu ítróttina í Føroyum.

Mong av tykkum, sum í dag eru við í kapprenningini, kappast við onnur og helst eisini við tykkum sjálvi, meðan vit í fólkaheilsurenningini helst mest kappast við okkum sjálvi og annars vilja taka eitt tak fyri góða fólkaheilsu.

Líka so nógv, vit í dag eru í tali, líka so nógvir mátar munnu eisini vera at fyrireika seg til ein dag sum hendan. Hvør í sínum lagi roynir at gera tað besta, óansæð um tað er fyri at vinna á øðrum ella bara at vinna á sær sjálvum.

Og hvør veit, um ikki júst ein túrur við Fólkaheilsurenningini í dag hjá onkrum verður startskoti til ein túr á hálvum ella heilum marathon-teini næsta ár? At fylkjast í flokki, tá endamálið er so gott sum hetta, er altíð mennandi.

Sum borgarstjóri í høvuðsstaðnum fegnist eg um tað stóra arbeiði, tit fyrireikarar hava lagt í henda dagin og hetta góða felags tiltak, og tað er ein gleði at síggja, at yvir 3.000 hava tikið undir við tí og vilja vera við í dag.

Eisini er tað stuttligt at síggja, at á hvørjum ári megnar Tórshavn Marathon at savna gestir úr útlondum, sum fegnir vitja hendavegin fyri at renna saman við tykkum og annars njóta ta góðu samveruna.

Dear guests from abroad. We wish you very welcome to the Faroes. We hope you will have a good experience today, and we hope you enjoy the stay in our islands.

Við hesum orðum vil eg ynskja tykkum øllum somlum ein góðan rennitúr. Nú verður farið undir eina felagsupphiting, og so verður renningin skotin í gongd.

Góðan túr øll somul og takk fyri, at tit lýddu á!

Heðin Mortensen
borgarstjóri