|
03.
mai 2008
Aðalfundur
Føroya Lærarafelags 3. mai 2008
Havi við hetta høvi hug at
nevna, at í summar verður ein nýggjur
skúli í Havnar kommunu tikin í brúk.
Ikki tykkum at siga, er talan um størstu skúlabygging
í Føroyum í nýggjari tíð,
og sum vit í kommununi vænta, verður eitt
nýbrot og ein fyrimynd í føroyskari
skúlabygging og skúlaskapi. Samlaði kostnaðurin
fyri skúlan liggur millum 150 og 170 mill. kr.
1. byggistig í hesi stóru verkætlan
er komið undir land, og eftir summarfrítíðina
byrja umleið 120 næmingar í nýggja
skúlanum við Løgmannabreyt. Talan er um
5 flokkar: tveir 1. flokkar, tveir 2. flokkar og ein 3.
flokkur umframt frítíðarskúla til
1. og 2. flokk.
Allur skúlin er sum sagt ikki liðugur enn, men
ætlandi verður alt arbeiðið liðugt
á heysti 2009.
Tá ið alt er liðugt verður skúlin
góðar 6.200 fermetrar. Har fara at ganga einir
450 næmingar í tveimum sporum frá 1.
til 9. flokk. Eisini kemur tannlæknastovu at vera
í skúlanum til børnini í Hoyvíkshaganum.
Vit hava spent bogan høgt, ásannandi, at skúlaverkið
er í støðugari broyting. Nýggjar
lógir, nýggjar lesiætlanir og nýggj
námsfrøðilig rák eru treytir, sum
skúlin skal laga seg eftir, og tað setur ómetaliga
stór krøv til alla framtíðar skúlabygging
og á nýtslu skúlans yvirhøvur.
Gongdin í skúlanum og innan undirvísing
yvirhøvur tey seinnu árini er so skiftandi
og broytist si skjótt, at eingin dugir at siga, hvussu
verður um 10 ár ella 20 ár. Tí
má ein skúlabygging vera liðilig og smidlig,
veggir og innrættingar skulu kunnu flytast soleiðis,
at tað skal bera til at byggja um ella afturat.
Treyðugt so, vit hava umbygt og bygt uppí næstan
allar skúlarnar í kommununi, eftir at búskaparkreppan
í nýtiárunum hæsaði av, og
nógv orka og nógvu peningur er seinastu árini
settur av at betra um umstøðurnar hjá
lærarum og næmingum í verandi skúlum,
men tað stóra takið at byggja ein nýggjan
skúla, ið lýkur øll krøv,
sum sett verða føroyskum skúlaskapi í
dag, og sum eisini er so liðiligur, at hann skjótt
kann broytast til krøvini í framtíðini,
- ja, tað takið hava vit tikið við nýggja
skúlanum í Hoyvíkshaganum.
Eg skal ikki fara í smálutir, men í
hesum skúla er stórur dentur lagdur á,
at hava allar hentleikar, ið settir verða einum
nútímans skúla, og at skúlin
gerst partur av grannalagnum uttan fyri vanliga skúlatíð.
Til dømis hevur skúlin dupulta fimleikarhøll
umframt, at stór og ljós kantina og námsfrøðiligur
tænastudepil er í miðhøllini, sum
kann hýsa mentanartiltøkum og øðrum
virksemi, ið fólk í grannalagnum taka
upp á seg og standa fyri.
Eitt, sum vit í kommununi hava lagt stóra
áherðslu á er, at byggja ein skúla,
sum skapar trivna og arbeiðsgleði hjá næmingum
og starvsfólki, og at vit fáa eitt arbeiðspláss,
har stórur dentur er lagdur á tann "estetiska"
partin. Tí er tilfarsvali fyrsta floks, og tá
talan er um eina stóra verkætlan, eru 1,5 mill.
settar av til list at prýða skúlan.
Í mun til flestu aðrar skúlar, ið
vit kenna, er nýggi skúlin við Løgmannabreyt
øðrvísi, tí her er ikki talan um
vanligar skúlastovur, men skúlastovur, har
tveir flokkar eru savnaðir saman í heimrustum,
sum hava smáar klivar og bólkarúm,
har til ber at undirvísa smærri bólkum,
og har góðir møguleikar eru fyri fjølbroyttum
undirvísingarvirksemi og tvørgreinaligum samstarvi
umframt at uttandura fríøki eisini er knýtt
at hvørjari heimrust.
Tað hevur alla tíðina ligið í
kortunum, at hesin skúli skal vera eitt nútímans
arbeiðspláss. Tí er ætlanin m.a.,
at arbeiðstíðin hjá lærarunum
verður frá klokkan 8 til 4, seinnapartin. og
eftir klokkan 4 hava teir frí.
Sjálvandi leggja vit ikki upp til, at allir lærarar
møta kl. 8 og fara heimaftur kl. 4.
Nei, tað merkir, at lærararnir eru tøkir
hesa tíðina til fyrireiking, samstarv og annað
virksemi. Tað verður eingi stempulklokku.
Um tað skal eydnast, eru krøvini sjálvandi,
at arbeiðsumstøðurnar hjá lærarunum
eru so góðar sum yvirhøvur gjørligt.
Og hesar karmar hava vit uppfylt.
Til ber at siga, at lærarin hevur tríggjar
arbeiðspallar. Ein er sosiali parturin á vanligu
lærarastovuni, síðani eru tað toymisrúmini
í heimrustunum, og at enda privata arbeiðsrúmið,
har lærarin hevur sítt arbeiðsborð
við hyllum og skuffum, sína persónligu
teldu, telefon og allar aðrar tekniskar hentleikar,
har hann kann sita fyri seg sjálvan og rætta
uppgávur, fyrireika undirvísingina og gera
allar sínar uppgávur, ið eru tengdar at
starvinum og samstarvinum í skúlanum, tí
skúlin er soleiðis skipaður, at tað krevur
nógv samstarv og ráðlegging millum lærararnar,
men karmarnir eru so eisini lagaðir eftir tí.
Í okkara nútímans samfelag, har flestu
okkara leggja stóran part av orkuni á arbeiðsplássinum,
má tað vera annað enn bert eitt stað,
har vit vinna til dagin og vegin. Arbeiðsplássið
eigur at skapa eina kenslu at vera partur av einum toymi
og samleika - har ikki bert verður tikið ímóti,
men eisini givið, tí at brúk er fyri hvørjum
einstøkum í toyminum, har hvør einstakur
gevur alt, hann eigur, til tess at náa settum og
kravdum málum.
Heðin Mortensen
borgarstjóri
|
