|
15.
mars 2008
Tórshavnar Kvøld- Ungdóms- og
Listaskúli
Góðan dagin og hjartaliga
vælkomin til framsýningina í Eysturskúlanum,
her næmingar vísa fram teirra avrik gjøgnum
seinasta kvøldskúlaárið.
Fyrsti várdagur er farin aftur
um bak, og so við og við verður innandura virksemi
hjá mongum lagt á hyllina fyri hesa ferð.
Eisini hetta skúlaárið hjá Tórshavnar
Kvøld-, Ungdóms- og Listaskúla er komið
at enda, og ein sera áhugaverd og spennandi framsýning
er at síggja her í dag.
Hesin skúli, sum er størsti
og mest fjølbroytti skúli í landinum,
er eitt tilboð til borgarar í Tórshavnar
kommunu um undirvísing eftir arbeiðstíð,
og nógv fólk í kommununi taka av hesum
tilboði, og tað eru vit sera fegin um.
Í Tórshavnar Kvøldskúla
hava hetta skúlaárið gingið uml. 3.200
næmingar, og hava vit eini 230 ymisk skeið, sum
141 lærarar eru knýttir at. Heili 13 nýggjar
lærugreinir eru eisini lýstar fram í
hesum skúlaárið.
Fyri at nevna nakrar av nógvu
lærugreinunum, so bjóðar skúlin
frálæru í nógvum ymiskum handarbeiði,
seyming, veving, sniðgeving, og so er tað máling,
postalínsmáling, træsmíð,
leir- og jarnarbeiði, og eisini fimleikur, sangur, tónleikur
og sjónleikur.
Og sum heitið á skúlanum
lýsir, so er eisini undirvísing innan list.
Undirvísingartilboð eru til
blind og sjónveik, og hevur skúlin haraftrat
eitt gott úrval av lærugreinum til rørslu-
og menningartarna.
Ja, ein sera fjølbroytt skrá,
og áhugavert er í dag at uppliva, hvussu væl
er komið burturúr í vetur, bæði
innan handverk og list.
Her virkar ungdómur, vaksin og
eldri. Øll kunnu vera við, so her eru ongar avmarkingar.
Hetta at ganga í kvøldskúla
er ein lívsstílur. Frá vøggu
til grøv eru vit undir ávirkan. Vit verða
ávirkað av okkara umhvørvi og av hvørjum
øðrum, og seinni verða vit ikki minni ávirkað
av tí, vit bæði síggja og hoyra,
og alt samalt er tað óivað við til at
forma okkara lívstíl.
Hetta síggja vit her í
dag. Vit síggja kreativitetin hjá hvørjum
einstaka næminginum, hann hevur sett sítt fingramerki
og sín stíl á málningar, postalínsmáling,
seyming, sniðgeving, smíð og ymist handarbeiði.
Flott úr hondum greitt.
1. Á framsýningini
síggja við tað mentunarskapandi, sum hvør
einstakur hevur lagt úr hondum hetta seinasta skúlaárið.
Tað er næstan ikki mark fyri hugflog av handverki,
sum verður gjørt og lagt fram í dag. Hetta
skulu tit øll – næmingar og lærarar
hava stóra, stóra tøkk fyri.
2. Vit síggja eisini tað
virði, sum tit hava skapt við at vera mentunarverjandi
fyri okkara gamla handverk og gomlu list, sum kanska annars
vildi verið gloymt. Hetta hevur ómetaliga nógv
at siga fyri okkara ungu og eftirkomarar, at tey soleiðis
eisini kunnu læra og kunna seg um, og vera við
til at varðveita tað gamla.
3. Við eini slíkari
framsýning hava vit sjón fyri søgn
um, hvussu umráðandi tað er at fáa
boðskapin fram, og verða mentunarboðandi um
okkara handverk, tónleik, sang og list í síni
heild.
Hetta hava tit øll verið
við til at fremja, tað síggja vit í
dag. Aftan á lokna arbeiðtíð, eru
tit farin aftur til verka um kvøldið at skapa
virðir á føroyska mentunarøkinum.
Eisini er yrkiskend undirvísing,
t.d. dugnaskapsroynd í sigling og dugnaskapsoynd
fyri frítíðarsiglarar.
So í kvøldskúlatilboðunum
er nógv spennandi, skapandi og mennandi.
Sum nakað nýtt og fyri at
betra um kunning og opinleika um virksemi kvøldskúlans
eins og bøta um samskiftið við brúkaran,
hevur Kvølsskúlin fingið eina nýggja
heimasíðu www.kvoldskulin.fo
Hetta vil avgjørt lætta
um hjá næmingunum til í góðari
tíð at leggja ætlanir og kanna valmøguleikar
fyri komandi skúlaár.
Eitt átak sum leiðsla skúlans
við umsiting hava fingið til vega til gagns fyri
øll, sum skulu brúka henda skúla.
Eg fari at takka øllum fyri eitt
gott skúlaár og ynskja næmingum og lærarum
góða eydnu við framsýningi.
Fari eisini at takka Jákup Pauli
Strøm og hansara umsiting fyri gott og kreativt arbeiði
skúlanum at frama.
Takk fyri og Gleðiligar Páskir
Heðin Mortensen
|
