|
6.
januar 2008
Vælkomin til Tórshavnar
Tað er hugaligt sum borgarstjóri
aftur at kunna bjóða vælkomin til ein hondbóltslandsdyst
í høvuðsstaðnum.
Tórshavn og høllin, vit
í dag sita í, hava verið ramma um mangar
góðar dystir. Hesir báðir, sum nú
verða móti Serbia og Ísrael, fara at verða
millum teir seinastu dystirnar, ið verða leiktir
í høllini, sum hon sær út í
dag.
Farið verður í næstum
undir eina størri út- og umbygging av góðu,
gomlu Ítróttarhøllini á Hálsi,
sum vit kenna so væl og eru vorðin so góð
við.
Týdningin av altjóða
ítróttarsamstarvi eiga vit at virðismeta
høgt. Hetta samstarv er við at seta okkara bý
og okkara land á heimskortið, eins og tað
eisini heima er við til at menna okkara samstarv í
bæði ítrótti og á annan hátt.
Men tað er ikki líkamikið,
hvussu vit umboða okkara land og felag úti og
heima. Bæði tá vit eru saman við landsliðum
eins og felagsliðum, ið luttaka í altjóða
tiltøkum. Sum vit taka í móti teimum
fremmandu gestunum, vit bjóða higar at luttaka
í altjóða dystum, verða vit eisini
mett og móttikin aðrastaðni.
Føroyar eru kendar fyri at vera
friðarligar og blíðar at vitja. Her býr
vinaligt fólk, sum tekur sær væl av sínum
gestum. Og vit eiga altíð at stremba eftir, at
soleiðis skal tað verða verandi.
Vit síggja júst í
hesum døgum einstaklingar, sum vinna seg alt longri
og longri fram í altjóða kappingum. Talan
er sjálvandi um samanfall av góðum evnum
og umstøðum kring íðkaran, sum gera
hesi frálíku úrslit, vit nú
síggja.
Eisini í felagshøpi eigur
hetta at bera til. Við góðum umstøðum,
bæði fysiskum og fíggjarligum, er gjørligt
at vinna okkum fram, so lagt verður merki til okkum
í altjóða høpi.
Vit hava verið har fyrr, og vit
eiga av øllum alvi at stremba eftir at koma aftur
upp hagar, sum tað er stuttligt at luttaka.
Við hesum dystum ið nú
verða leiktir, verða fyrstu stigini tikin. Um enn
vit vera eitt sindur trilvandi í byrjanini, er ikki
at missa mótið, men við góðum
treysti at halda á.
Í felag eiga bæði leikarar,
felagsleiðslur, áskoðarar og allir aðrir
góðir stuðlar at vera við til at bera
okkum fram hagar, har vit gera Føroyum æru
við okkara ítróttarligu luttøku.
Tað er hugaligt, at manslandsliðið
í hondbólti aftur er farið at luttaka
í altjóða kappingum. Í hesum umfarinum
verða fýra dystir leiktir. Tveir útidystir,
og tveir her í høllini.
Tórshavnar kommuna bjóðar
øllum vælkomnum til landsdyst í hondbólti
í Ítróttarhøllini á Hálsi.
Góðan dyst.
Heðin Mortensen
borgarstjóri í Tórshavnar kommunu og
ÍSF forseti
|
