11. november 2006

Ebenezer

Góða samkoma

Tað er mær ein stór gleði vegna Tórshavnar býráð at bera fram eina heilsan her í dag, nú ið stóri salurin í Ebenezer eftir stóra og umfatandi nýumvæling aftur er klárur at taka í brúk hjá samkomuni.

Heilsanin og gleðin er bæði persónlig og almenn.

Samkoman hevur fingið ein stóran, vakran og ljósan sal við nýggjum listaverki eftir Eyðun av Reyni og nýggja urgu, og havi eg eina kenslu av, at øll í samkomuni stillisliga hugsa: “Endiliga er dagurin komin”. - Dagurin, sum øll í samkomuni hava longst eftir.

Nú, ið arbeiðið er liðugt, er onki løgi í, at øll eru ovurfegin, og gleðast um eitt væl úr hondum frágingið arbeiði.

Tað merktist alt fyri eitt, tá ið komið var upp í stóru trappurnar uttanfyri, at øll eru stórliga fegin, at stóri salurin nú stendur liðugur, soleiðis at allur bygningurin aftur kann verða tikin í brúk, eftir at menn og kvinnur í eitt knapt ár hava brúkt so at siga hvørja fríløtu at umvæla salin.

Tað prógvar, hvussu sterkar og djúpar kenslurnar eru fyri hesum samkomuhúsi og tí gleðiboðskapi, ið verður boðaður hiðani.

Hoyrdi í samrøðu í Útvarpinum í gjáramorgunin, at mestsum alt arbeiði er gjørt sjálvboðið, og at mett verður, at umleið 10 ársverk eru brúkt í hesum ósjálvsøkna arbeiði. Tað sigur ikki so lítið um samanhaldið og offurviljan í Brøðrasamkomuni.

Hjá okkum, ið búðu á hesum leiðum í miðbýnum, og sum vóru børn og ung í Havn í fimmti- og fyrst í sekstiárunum, gekk leiðin hvønn dag framvið gamla Ebenezer, tá ið vit fóru í og úr skúla.

Havnin var nógv øðrvísi tá, ikki størri enn so, at øll kendu hvør annan og vistu hvør var hvør.

Árliga nýggjársfestin fyri havnarbørnum og útimøtini uttan fyri Ebenezer, har vit lýddu á sang, Guðs orð og vitnisburð.

Møtini og jólahaldini hjá øðrum samkomum í býnum eru alt partur av tí kjølfesti, sum hevur ligið fast alla tíðina í huga, sál og sinni.

Tað er við takksemi og eyðmýking, at eg minnast aftur á hesa tíð.

Sum borgarstjóri í kommununi fegnist eg um, at samstarvið við samkomuna altíð hevur verið gott og fyrimyndarligt, og eg tori at siga, at tað hevur verið til gagns og gleði fyri báðar partar.

Havi hug í hesi heilsan at nevna frítíðararbeiði fyri børn og vikuligu ungdómsmøtini, har fleiri hundrað børn og ung koma saman eina ferð um vikuna.

Sunnudagsskúlin, har eini 200-300 hvønn sunnudag koma at lurta eftir bíbliusøgum og at syngja saman.

Og summarlegurnar á Zarepta fyri børn og ung. Alt tiltøk, ið sanniliga eru góður andaligur førningur at hava við sær út í lívið.

Tað má eg siga, at lívsjáttandi og hugtakandi er at síggja bussarnar uttan fyri Ebenezer fyllast við glaðum og spentum børnum á veg á summarlegu. Spelkin veittra tey foreldrunum farvæl. – Siga líkasum: Vit eru í góðum hondum. Tað sæst, at tey gleða seg at fara á legu.

Hetta er alt stórt og týðandi virksemi, sum hevur ómetaliga stóran týdning fyri trivnaðin og uppalanina av okkara børnum og ungu í høvuðsstaðnum.

Fyri tey eldru og tilkomnu í kommununi verður eisini nógv gjørt. Dømi um tað, eru eldrasamkomurnar eina ferð um mánaðin.

Tórshavnar kommuna og samkoman í Ebenezer samstarva á so nógvum økjum.

Eitt er heimið hjá gamla Sloan við Tinghúsvegin. Kommunan eigur húsini, men tað er brøðrasamkoman, sum umsitur og brúkar ognina, og tað sæst, at húsið er í góðum hondum. Eitt vælrøkt hús í allar mátar.

Annað er frálíka samstarvið vit hava við góðu sangkreftirnar í Dupultkvartettini og Ebenezerkórinum. Framúrskarandi sangkreftirnar, sum stór virðing stendur um, bæði her heima og uttanlands.

Komi at hugsa um hugnaløturnar í t.d. Undirhúsinum undan jólum.

Sangurin og andaktirnar á m.a. Lágargarði, Tjarnargarði, Hvíldarheiminum, Røktarheiminum, Ellisheiminum, Landssjúkrahúsinum og í eldrasambýlum fjálga um og linna lívskvøldið hjá teimum gomlu og sjúku.

Hetta er alt sjálvboði arbeiði í Harrans tænastu.

Sangkreftirnar í Ebenezer verða eisini mangan brúktar, tá ið kommunan hevur vitjan og til onnur høvi. Altíð til reiðar tá ið heitt verður á teir um eina hjálpandi hond.

Í býarumsitingini fegnast vit um, at arbeiði at umvæla salin nú er liðugt, tí stóra og fjølbroytta virksemi í Ebenezer hevur stóran týdning og skapar lív og virksemi í miðbýnum. Sum tit vita og síggja roynir kommunan at gera sítt til, at hugna um miðbýin, og síggja vit fram til, at arbeiði at leggja flísarnar á gongugøtuna verður liðugt um ikki so langa tíð.

Sjálvt um alt í salinum er broytt, og hann ikki er at kenna aftur, so er innihaldið og boðskapurin enn sum áður hin sami! Hann er ikki broyttur: at boða Guðs orð við sangi, tali og vitnisburði.

Lat meg at enda ynskja Guds signing yvir virksemi í Ebenezer og tað arbeiði, ið verður gjørt hiðani.

Takk fyri

Heðin Mortensen