09.12.2005

Heimið fyri minnisveik í Vallalíð

Hjartaliga vælkomin – góðu búfólk, starvsfólk, avvarðandi og øll tit onnur, ið eru komin saman her í dag, nú Heimið fyri minnisveik alment verður tikið í brúk.

Tað er mær ein stór gleði at verða við til hesa hátíðarløtu, tí dagurin í dag er sanniliga ein merkisdagur í kommununi.

Sitandi býráðs setti sær sum aðalmál at leggja alla orku í fáa teimum eldru í kommununi betri og tryggari kor, ásannandi rættin til eitt gott og virðiligt lív, eisini á ellisárum, ella tá ið sjúka og heilsan eru farin at bila.

Skjøtul er settur á hetta arbeiði. Vit hava longu tikið fleiri tøk, og fyrireika enn fleiri.

Eitt úrslit av hesum miðvísa arbeiði er Heimið fyri minnisveik í Vallalíð, ið vit í dag handa bú- og starvsfólki. Og tað leggur ein alt fyri alt til merkis, at her er heimligt og hugnaligt.

Her er brotið upp úr nýggjum. Tí hugskotið og ætlanirnar við einum slíkum heimi eru ikki royndar áður her á landi. Men við einum góðum vilja og góðum samstarvi ber alt til.

Vit hava eftir besta førimuni fyrireika hesa verkætlan so væl sum gjørligt, tí vit eru á ótroddum gøtum. Her er stórur dentur lagdur á at skapa so góðar og tryggar umstøður, sum tað yvirhøvur letur seg gera. Starvsfólkið hevur fingið møguleika at hugsavna seg um sítt komandi arbeiðspláss m.a. við skeiðvirksemi.

Leiðarin, Ida Sørensen fer at greiða nærri frá, hvussu ætlanin er at skipa Heimið.

Hetta heimið er liður í eini heildarætlan, sum kommunan hevur á eldraøkinum.

Arbeiði byrjaði, tá ið vit fyri nøkrum árum síðani keyptu gomlu Marinustøðina við tí í hyggju at brúka ognina sum ellisheim og dagtilhald fyri minnisveik. Tjarnargarður, sum niðurlagda støðin kom at eita, varð tikin í nýtslu í oktober mánaða í fjør, og fyri nøkrum døgum síðani samtykti býráðið at byggja eitt nýtt røktarheim til 24 búfólk við Tjarnargarð. Hetta arbeiðið verður boðið út í næstum.

Ætlanin er, at á Tjarnargarði verður møguleiki at fáa fyribyrgjandi fysio- og ergoterapeutiskar venjingar við tí endamáli, at tey gomlu og sjúku varðveita førleikan longri, og harvið hava eina betri lívsgóðsku. Tað minkar eisini um tørvin á røktarheimsplássum.

Arbeitt verður eisini við øðrum fyribyrgjandi tiltøkum, soleiðis at okkara gomlu kunnu verða heima í egnum bústaði sum longst.

Eitt ítøkiligt tiltak í hesi ætlan er heimavitjanartænastan, ið kommunan setti á stovn í 2002, og í ár verður tænastan víðka soleiðis, at tilboðið eisini verður veitt teimum, sum eru 75 ár og eldri.

Men tørvurin á bú- og røktarplássi til tey eldru er stórur, og til tess at bøta um bráðneyðuga tørvin, hevur kommunan keypt eini stór sethús í Mattalág at brúka sum ellisheim, har pláss verður fyri 10 fólkum.

Býráðið hevur eisini keypt eina stóra trøð (18.000 m²) Yviri við Strond, har ætlanin er at byggja eldrabústaðir. Virksemið har skal samskipast við Lágargarð, sum er nærmasti granni.

Um økið er at siga, at tað er náttúruvakurt og liggur sera væl fyri. Frítt er uttanum, mitt í býnum, og við góðum útsýni yvir allan Nólsoyarfjørð.

Í vár gjørdi ein arbeiðsbólkur eitt álit um eldraráð í kommununi, sum fer at virka frá 1. januar 2006.

Tað er ein sannroynd, at talið av fólki, sum verða rakt av sjúkuni Alzheimer og øðrum demenssjúkum veksur alsamt um allan heim, og kunnu vit rokna við, at tað eisini her hjá okkum verða fleiri, sum fáa hesa sjúku. Tað setur sjálvsagt krøv til okkara kommunu, og her kann ein vælútbygd heimarøkt og fleiri dagtilboð gera tað møguligt at verða longri í egnum heimi saman við sínum nærmastu og kæru.

Tá ið tað ikki ber til, eigur møguleiki at vera at flyta inn í vardar íbúðir ella røktarheim, sum eru egnað til tørvin hjá tí einstaka, og skulu tí fleiri pláss útvegast í kommununi komandi árini.

Eg fari at ynskja okkum øllum hjartaliga tillukku við hesum heimi fyri minnisveik og ynski eg búfólki og starvsfólki alt gott í komandi tíðum.

Somuleiðis takki eg nevndini í Alzheimersfelagnum fyri tykkara ótroyttiliga arbeiði at skapa virðiligar, góðar og tryggar umstøðurnar hjá tykkara nærmastu. Tykkara áhaldandi upplýsingararbeiði hevur í dag borið frukt. Uttan tykkara miðvísa arbeiði hevði ikki so nógv verið hent innan demensøkið seinastu tíðina.

Vón mín skal verða, at tit, sum búgva her og tit, sum koma at arbeiða her, koma at trívast í hesum hugnaliga og heimliga heimi.

Vit eiga ongantíð at gloyma, at tað eru okkara eldru, ið hava bygt hetta land og skapt møguleikarnar, vit onnur í dag njóta gott av. Tí er eldraøkið eitt mál, ið sitandi býráðssamgonga leggur stóra orku í at loysa.

Gleðilig jól og gott nýggjár.

Til síðst fara eg at biðja leiðaran, Idu Sørensen, um at koma og taka ímóti eini gávu frá býráðnum.

Heðin Mortensen, borgarstjóri