09. - 11. september 2005

Vørumessan 2005

myndaeigari: Jens Kristian Vang - jensk@sosialurin.fo

Góðu gestir úr bygd og úr bý!

Tað er mær ein stór gleði at hava fingið høvi at seta árligu Vørumessuna, - ta áttandu í røðini, sum Marknaðarføring við Birgiri Poulsen í Saltangará skipar fyri í Havn.

Áhugin fyri Vørumessuni hevur øll árini verið ovurhonds stórur, og sum eg havi skilt, eru tað fyritøkur, ið longu nú tryggja sær pláss næsta ár, havandi í huga, at rásarúmið her í Ítróttahøllini á Hálsi er avmarkað. - So tað ræður um at vera úti um seg í góðari tíð.

Í handils- og tænastuvinnuni er hvør dagur ein avbjóðing. Alla tíðina er neyðugt at tillaga seg dagsins fortreytum og møguligum broytingum í sølu, tænastu og marknaði. Kappingin - bæði innlendis og uttanífrá - gerst alsamt størri og størri, samstundis sum fylgt má verða væl við, hvat er uppi í tíðini. Men tað er væl tað, ið ger hesa vinnu spennandi hjá tí einstaka.

Eins og undanfarin ár er Vørumessan eisini hesaferð fullteknað. Og tað fegnast vit um í kommununi, tí slíkar vørumessur kasta av sær til aðrar tænastuvinnur í býnum. Her hugsi eg um t.d. hotellini, gistingarhúsini og matstovurnar, flutningsfeløg og hýruvognar, handverkarar og teknistovur. Ja, alt í alt eitt gott íkast til handilsvirksemi í býnum. Tí skal týdningurin við slíkum handils- og sølumessum ikki verða undirmettur.

Eg ivist onga løtu í, at her eru góðir møguleikar at skapa varandi bond og byggja brýr millum fyritøkur, umboðsfólk og viðskiftafólk og at styrkja um sínámillum samskiftið.

Í dagsins handilsmentan verður stórur dentur lagdur á, at fyritøkur skulu marknaðarføra seg, gera seg sjónligar, og er ein vørumessa av hesum slagi eitt frálíkt høvi til tess.

Øll, sum fáast við handil vita, at samskiftið við viðskiftafólkini hevur alt at siga. Tey, sum hava eitthvørt at selja, hava her høvi at hitta tey, sum eru áhugað at keypa. Ein vørumessa er hartil eitt gott bindilið – ein samskiftispallur millum útvegara og viðskiftafólk, og tískil meiri viðkomandi, har til ber at spáka millum básarnar, og síggja úrvalið og bíleggja tað, sum hevur áhugað.

Gleðiligt er at staðfesta, at stórt sæð allar heilsølurnar - stórar og minni stórar - í landinum eru við, umframt fyritøkur, ið veita tænastur.
Skal tað framhaldandi vera liviligt í Føroyum, er uppgávan hjá okkum kommunal politikarum at skapa góðar umstøður hjá handilsfólki og vinnulívi at virka og mennast, soleiðis at vinnuliga og handilsliga margfeldi hevur best møgulig kor at virka undir.

Vit mugu gera okkum púra greitt, at tað er hetta virksemi, ið ber einum sunnum samfelagi uppi. Samstarv og kapping er góð og gagnar í síðsta enda borgaranum. Eitt trygt og fjølbroytt handils- og vinnulív gevur okkum eitt gott land at arbeiða og búgva í.

At føroyskar fyritøkur og handilsfólk leggja stóran dent á at kunna seg um, hvat hendir á teirra øki og at vísa fram egnar framleiðslur og tænastur, vísir stóri áhugin fyri messum og sølustevnum uttanlands.

Í vikuni hevur stór oljumessa verið í Aberdeen, har føroyskar fyritøkur eisini luttóku, og í gjár var stór fiskivinnuframsýning sett í Íslandi. Eisini har eru føroyskar fyritøkur umboðaðar, og gleðiligt er at staðfesta, at nakrar av hesum fyritøkum eisini eru at síggja her í Høllini.

Mín fatan er, at støði á hesi Vørumessu er fult á hædd við tær sølustevnur, ið vit síggja í øðrum londum. Her er løgd stór orka í bæði hjá fyrireikara og tykkum, sum sýna fram. Heildarmyndin vísir eitt spennandi og fjølbroytt úrval.

Fyri Tórshavnar kommunu fari eg at bera fram øll góðynski fyri Vørumessuna 2005. Ynski mítt skal vera, at komandi tríggir dagarnir her í Ítróttarhøllini fara at eydnast væl.

Fari eisini at nýta hetta høvið at takka tær Birgiri Poulsen og hjálparfólki tínum, at tit enn einaferð hava skipað fyri eini fjølbroyttari Vørumessu og á so høgum støði.

Somuleiðis takki eg tykkum handilsfólki fyri, at tit taka so væl undir við tiltakinum og á henda hátt royna at skapa eina handils- og framsýningarmentan í Føroyum, sum í síðsta enda gagnar brúkaranum og soleiðis øllum samfelagnum.

Tað er mín vón, at tit við eitt slíkt høvi eisini geva tykkum stundir at steðga á eina løtu í býnum, tí Havnin er full av lívi. Her er fjølbroytt handilslív og áhugaverd mentanartilboð.

Enn einaferð, gestir av bygd og úr bý, vælkomin til Havnar.

Takk fyri og góða Vørumessu!