10. september 2005

Gluggaglæma 2005

Góðu fyrireikarar og framsýnarar – góðu gestir

myndaeigari: www.olivant.fo

Eg eri takksamur og glaður um, at tað í ár er fallið mær í lut at seta hesa søluframsýning, ið ber heitið Gluggaglæma.

Sum borgarstjóri fegnist eg um, at Müllers Pakkhús er karmur um hesa framsýning, og ikki er tað sørt, at eg frøist um, at vit í sínari tíð tóku avgerð um at varðveita og gera í stand hesa mentanarligu perlu við Vestaruvág, ið sum frá líður kemur at standa sum eitt virðiligt og prýðiligt minni um eina farna tíð.

Tá ið eg í gjár sat handan gluggan á skrivstovu míni í hjartanum í Havn ella sum heimskenda skald okkara, William Heinesen, segði: Í heimsins nalva, kom eg at hugsa um orðini, William skrivaði í nøkrum hugleiðingum um okkara listamálarar og verk teirra: At líka so umráðandi tað er, at góð listaverk verða skapað, er sjálvandi tað, at tað eru eygu, ið kunnu gleðast um tey.

Hesi orð hóska væl til áskoðanina hjá Tórshavnar kommunu, tá ræður um at gera list, handverk og gagnlist sjónlig. Kommunan eigur fleiri framsýningarhøli í býnum. Eitt er hesin høgi, grótlaðaði saltkjallarin hjá Sørini Müller, sum fyri nøkrum árum síðani varð settur í stand, og sum í dag, fyri triðju ferð, er karmur um framsýningina Gluggaglæma.

Uttanfyri gluggan á skrivstovu míni var í gjár av besta veðri, nú farið er um mariumessu um heystið.

Kom at hugsa um tykkum, sum í dag alment lata tykkara listaliga glugga upp, og bjóða okkum at kaga inn í tykkara kreativa snið- og handverksheim, fyri at vísa okkum, hvat og hvussu tit arbeiða og virka. Gævi, at tit vekja hugin hjá øðrum fyri handaligum og listaligum arbeiði, og soleiðis læra onnur at síggja vakurleikan og virði í at nýta egnan skapanarmátt.

Framsýningin vit her síggja prógvar stórt skapandi arbeiði millum fólk, ið hava áhuga og duga at síggja, virka og virða náttúrutilfeingi okkara, og sum við sínum handverki og vitan duga at vegleiða og læra frá sær.

Eitt skulu tit vita. Tórshavnar býráð hevur stóra virðing fyri tykkara arbeiði og virksemi, tí vit vita væl øll, hvussu ómetaliga stóran týdning tað hevur fyri vælferðina og trivnaðin í bygd og í bý at hava góðar umstøður og møguleikar fyri skapandi virksemi.

Í summar høvdu vit kongaliga vitjan í býnum, og í samband við gávurnar til teir kongaliga gestirnar var tað eingin ivi hjá býráðnum um, hvat skuldi veljast til gávur. Heitt var á nakrar av okkara egnu dugnaligu sniðgevum um at tilvirka gávurnar, sum vit vóru sera vælnøgd við, og handanin, sum fór fram júst í hesum hølunum, var sera væl móttikin av drotningini og fylgi hennara.

Fari at nýta hetta høvi at takka tykkum báðum, Jónhild Johannesen og Randi S. Vang fyri tykkara ótroyttiliga og slóðbrótandi arbeiði í sambandi við Gluggaglæmu- verkætlanina. Enn einaferð hava tit báðar saman við øðrum lagt til rættis eina fjølbroytta og áhugaverda framsýning í Müllers Pakkhúsi.

Ynski mítt skal vera, at komandi dagarnir í Müllers Pakkhúsi fara at eydnast væl til gleði og gagns fyri bæði tykkum og okkum, og at vit, tá ið farið verður útum gluggan, hava gjørt okkum eina positiva mynd av, hvussu fjøltáttað handverk, gagnlist og brúklist kann verða.

Vegna Tórshavnar kommunu fari eg at ynskja hesi søluframsýning alt tað besta við orðunum hjá Williami Heinesen, tó við eini lítlari broyting: At líka so umráðandi tað er, at góð snið og gott handverk verður skapað, er sjálvandi tað, at tað eru eygu, ið kunnu gleðast um tað, tey síggja.

Takk fyri og góða eydnu