|
05.
august 2005
Listastevnan
2005
Góðu luttakarar,
gestir og áhoyrarar!
Fyri trimum árum síðan
fall mær í lut at seta Listastevnuna 2002.
Eg hugleiddi tá um tað ótrúliga
í, at vit kundu fylgja okkara aldargomlu mentan úr
útlondum til Føroya, her hon var varðveitt,
fyri síðan at fylgja henni út í
heim og heimaftur til Føroya. Óteljandi dømi
vóru tá um listafólk, sum komu til
Føroya at sýna og framføra ymiskt,
ið bygdi á okkara egna mentanararv - ella rættari:
Tann mentanararv, ið varðveittur var í Føroyum
gjøgnum øldir.
Vit hoyrdu Wagner við Sjúrðarkvæðunum
sum keldu. Vit hoyrdu bólk úr New York við
verki, ið bygdi á okkara sagnir og kvæði.
Vit upplivdu tá stutt sagt eina samanrenning av einum
felags mentanararvi, sum ongastaðni er so væl
varðveittur sum akkurát í Føroyum.
Hesaferð er skráin øðrvísi,
men nú vit seta hol á fimtu Listastevnuna
er hon eins fjølbroytt, og listarliga støðið
eins høgt, sum hetta sera stóra tiltakið
var lagt upp til frammanundan. Og samanrenningin av felags
mentanar-arvinum sæst í mongum førum
aftur.
Amerikanska superstjørnan Barbara
Hendricks, búsitandi í Svøríki,
vitjar. Fraklendingar framføra føroysk verk,
franskt sirkus vitjar, vit uppliva heimsgitnan íslendskan
leik á føroyskum, írskan nobelprísvinnara
innan bókmentir, norðurlendska og føroyska
list, filmar í heimsflokki - og vit runda av við
føroyskari dansinátt.
Listastevnan umfatar ikki bert Norðurlandahúsið,
men tiltøkini eru spjadd um býin og kring
landið. Í 2002 løgdu vit sera stóran
dent á, at tað í mongum førum var
tann mentan, vit í Føroyum høvdu varðveitt
fram um onnur gjøgnum øldir, sum var grundarlag
undir fleiri av listarligu tiltøkunum. Tí
frøir tað meg persónliga at síggja,
at eitt av tiltøkunum uttanfyri miðøkið
er dansináttin, sum hesaferð verður hildin
í Øravík. Tí tað var júst
gjøgnum kvæðini, nevnda mentan og søga
varð varðveitt, og valla nakrastaðni so væl
sum í Suðuroynni.
Hesaferð skulu vit eisini hava nakað
at flenna at. Og tað fáa vit ríkilig høvi
til í Aurelias Oratorio, ið Victoria Chaplin
stjørnar í Norðurlandahúsinum,
í einrøðuleikinum Sellofan, ið Kristina
Hansen framførir á Meiarínum.
Og ikki minst, tá okkara lokalu Pipar & Salt
fara á pallin í Norðurlandahúsinum,
ella tá vit seta okkum at síggja filmin "Adams
Æbler" í Havnar Bio.
Og skulu vit hvíla eyguni við
list í heimsflokki vitja vit Listasavn Føroya,
Smiðjuna í Lítluvík, Mullers Pakkhús,
Ribarhús í Fuglafirði ella Oynna á
Tvøroyri.
Meðan vit frøast um at fáa
vitjan av donsku tónleikadrottningini Anne Linnet,
og at okkara egna Annika megnar at syngja í bæði
Sjónleikarhúsinum í Havn, í
pakkhúsinum í Vági, í Virkinum
á Sandi og í fimleikarhøllini á
Glyvrum, so er tað samstundis ein serstøk gleði
enn einaferð at taka ímóti Rúna
og Susanne Brattaberg, sum fara at framføra saman
við Føroya Symfoniorkestri og kórinum
Tarira.
Tíð og rúmd er ikki
hjá mær at lesa ella viðgera alla skránna.
Men eins og áður er stevnan merkt av eini fjølbroyttari
samanrenning, eisini hesaferð við endurljóði
úr okkara mentanar-arvi. Her verður hjúklað
um okkara leik-, tónleika- og listmentan, her er
vítt til veggja og nakað fyri øll.
Og júst fjølbroytnið
frøir meg mest, tí her eru enn sum áður
ikki bert úrvaldar listarligar "sjangrur",
sum bert umboða og hava áhuga fyri eitt fátal,
men góð og felags fólkamentan, sum eg
enn einaferð gleði meg til at uppliva.
Tórshavnar býráð
er saman við Norðurlandahúsinum høvuðsaktørur
fyri stevnuni, og er Listastevnan við til at gera trivnaðin
í býnum, ja øllum landinum, betri.
Her koma fleiri vitjandi, fyritøkur njóta
gott av stevnuni, og fólk gerast eisini glaðari
av at fara til eina koncert ella annað tiltak.
Kære deltagere og gæster.
Som borgmester i Tórshavn vil jeg ønske jer
hjertelig velkommen med ønsket om en god, hyggelig
og lærerig festival, der vil knytte mange venskabsbånd
til glæde for alle deltagende og til indtægt
for de kommende årlige festivaler.
Góðu luttakarar, gestir og
áhoyrarar. Fari nú at ynskja øllum
eina góða stevnu og gott undirhald og lýsi
hervið Listastevnu Føroya 2005 at vera setta.
Takk fyri
Heðin mortensen
borgarstjóri
Mynd: Helena Dam Poulsen
|
