28. mai 2005

Tónleikafagnaður fyri menningartarnað

Góðu tónleikarar og áhoyrarar!

Lat meg fyrst siga, at eg eri ógvuliga glaður um at sleppa at heilsa upp á tykkum og at siga nøkur orð, áðrenn Teitisfestivalurin 2005 um eina lítla løtu fer at byrja. Eg haldi meg hava lagt til merkis, at tónleikararnir eru ógvuliga spentir at sleppa í gongd.

Vegna Tórshavnar kommunu skal eg bjóða tykkum øllum at vera hjartaliga vælkomin í Kommunuskúlagarðin í dag.

Kære nordiske gæster

Som borgmester her i byen, er det mig en stor glæde at få denne lejlighed til at byde jer velkomne til Torshavn.

For vores by er det en stor hæder at være ramme om denne musikkfestival.

Slíkir tónleikafestivalar sum hesin, eru vælkendir uttanlands og hava stóra undirtøku. Og tað sær út til, at vit her heima eisini eru gott á veg at fáa hetta tiltakið at verða afturvendandi á hvørjum ári.

Og tað er frálíkt, tí ein slíkur festivalur er eitt gott høvi at varpa ljós á menningartarnað og teirra tónlistarligu gávur. Samstundis er ein slíkur dagur eitt gott høvi at vera saman, stuðla og læra hvør av øðrum, og fáa nýggjan íblástur.

Tað er gleðiligt, at fyrireikararnir aftur í ár skipa fyri hesum tiltaki, og ikki mistu mótið, tá hugsa verður um, at veðrið í fjør ikki var av tí besta. Tøkk skulu tit hava, at tit royna aftur í ár.

Seinastu tíðina hevur eitt sindur av kjaki verið um allar tónleikafestivalarnir, sum í ár verða um landið. Tað er kanska okkurt um tað, men tit skulu vita, at í Tórshavnar kommunu fegnast vit hvørja ferð býurin er karmur um tónleikar- og mentanartiltøk. Tí tað hevur so ómetaligan stóran týdning, at vit hava møguleika at koma saman í frítíðini um felags áhugamál og í góðum umhvørvi.

Og tit tónleikarar!

Við tykkara eldhuga og ágrýtni tori eg at siga, at endamálið við hesum festivalinum er rokkið:

At skapa ein fagnað fyri menningartarnað, sum gevur tykkum høvi at vera saman um tónleik og list í einum tiltaki, sum tit sjálvi eiga. Og eg ivist onga løtu í, at hesin festivalurin styrkir samanhaldið millum tykkum.

Kære nordiske venner

På Torshavns kommune vegne bringer jeg Festivalen alle de bedste ønsker. Vi er meget glade for, at I afholder denne Festival i byen, og jeg er sikker på, at I alle vil få en oplevelse for livet, og at I vil få mange gode og glade minder med hjem fra vores smukke øer og by.

Vegna býin vil eg takka tykkum øllum – samskipara og tónleikarum - fyri tykkara íkast at skapa trivna og hugna í býnum. Tað er áhugavert at síggja og uppliva, hvussu høgt tit ganga upp í tykkara tónleik

Tit skulu vita, at tit eru ein virðismikil partur á føroyska tónleikapallinum.

Við hesum orðum er Teitistiltakið 2005 sett, og ynski eg tykkum øllum ein góðan festival-dag.

Takk øll somul og góða eydnu við tiltakinum.