North Atlantic Fish Fair 2005 - 3. til 5. mai 2005

Góðu stevnugestir!

Verið hjartaliga vælkomin til Havnar!

Eg eri ógvuliga takksamur og glaður um, at tað er fallið mær í lut at bera fram eina heilsan frá Tórshavnar kommunu, nú býurin er karmur um fiskivinnustevnuna North Atlantic Fish Fair 2005.

Hetta er triðja altjóða fiskivinnustevnan av sínum slag, sum Atlantic Fair skipar fyri. Tær báðar fyrru stevnurnar hava verið í Runavík, men hesaferð er hon flutt til Havnar, og tað fegnast vit í kommununi sjálvsagt um, tí Havnin hevur upp gjøgnum tíðina verið handils og tænastu miðdepulin í Føroyum.

Tá ið fyrireikararnir vendu sær til okkum fyri at kanna, um møguleiki var at flyta stevnuna til Havnar, vóru vit ongantíð í iva, tí her fingu vit eitt gott høvi at varpa ljós á okkara “deiligu Havn”.

Tað hevur altíð ligið frammaliga í politiska arbeiðinum í kommununi at fáa sett Føroyar og høvuðsstaðin á heimskortið sum altjóða ráðstevnu- og framsýningarbý. Tí tóku vit við vælvild av hesum møguleika, nú í vit fingu hann.

Men frammalaga í huganum lá eisini, at ein so stór altjóða fiskivinnustevna hevur týdning fyri tænastuvinnuna í býnum, her hugsi eg um t.d. hotell og matstovur, flutningsfeløg og hýruvognar, handverkarar og teknistovur, dansihølini og útskonkingarstøðini, ja í heila tikið alla handilsvinnuna yvirhøvur.

Men høvuðsendamálið við hesi fiskivinnustevnu, er sjálvandi at vísa, hvussu fjølbroytt útboðið innan fiskivinnu og tænastur er í bygd og í bý.

Tað er eisini gleðiligt at síggja, at so nógvar útlendskar fyritøkur eru áhugaðar at sýna fram teirra vørur, framleiðslur og tænastur.

Eg havi somuleiðis lagt til merkis, at fleiri norðurlendskar kommunur og havnir eru komnar at vísa teirra tænastur.

Eg ivist onga løtu í, at her eru góðir møguleikar at skapa varandi bond og byggja brýr millum fyritøkur og umboðsfólk.

Samstundis gevur tað okkum herheima eitt gott høvi at kunna okkum um tað, sum rørist uttanlands.

Í modernaðum handilslívi verður stórur dentur lagdur á, at fyritøkur marknaðarføra seg. Tær skulu gera seg sjónligar. Ella, sum sagt verður við einum fínum orði: Fyritøkan skal “profilera” seg!

Eitt annað hugtak, ið er nógv frammi, er “kundarøkt”, og sum øll vinnurekandi vita, er ein týdningarmikil táttur, skal fyritøkan mennast og økja um virksemi.

Hesi bæði hugtøkini: Marknaðarføring og kundarøkt eru hornasteinarnir, skal fyritøkuni verða lív lagað.

Tí er ein fiskivinnustevna sum henda, eitt gott høvi hjá vinnuni og tænastuveitarum at skapa samband hvør við annan og styrkja um sínámillum samskiftið.

Tað hevur alstóran týdning, at tey, sum hava eitthvørt at selja, fáa høvi at hitta tey, sum hava hug at keypa „face to face“.

Eg havi eisini hug at nevna, at tað er ein fyrimunur, at alt er samlað á einum stað, har til ber hjá keyparum og seljarum at hittast til eitt óformelt ella formelt prát í básunum og síggja og kunna seg um fjølbroytta úrvalið, tá ið ræður um fiskivinnu, tænastur og veitingar.

Stórt sæð allir útvegarar - stórir og minni stórir - í landinum eru við, umframt nógvar fyritøkur, ið veita tænastur til fiskivinnuna.

Tað er gleðiligt at staðfesta, at tær stóru kommunurnar í landinum hava tikið væl ímóti hesum møguleika at profilera seg, tað veri seg sum kommuna ella sum samskipari av vinnu, tænastu, veitingum og virksemi í kommununi.

Tí, um tað framhaldandi skal vera liviligt í Føroyum, er grundleggjandi uppgávan hjá okkum politikkarum at skapa góðar umstøður fyri vinnu- og handilslívi, soleiðis at hesar vinnur hava so góð kor og góðar umstøður sum til ber at virka undir. Tí eitt trygt vinnulív gevur trygga framtíð, og eitt gott land at arbeiða og búgva í.

Vit mugu gera okkum púra greitt, at tað er vinnuvirksemi, ið ber einum sunnum samfelag uppi. Kapping á vinnu- og tænastuøkinum er góð og sunn og gagnar í síðsta enda brúkaranum.

At føroyskar fyritøkur og handilsfólk leggja stóran dent á at kunna seg um, hvat hendir á teirra øki, og at vísa fram egnar framleiðslur, vísir stóri áhugin fyri messum og sølustevnum uttanlands.

Men mín fatan er, at støði á hesi fiskivinnustevnuni er fult á hædd við slíkar stevnur, ið vit síggja í øðrum londum. Her er løgd stór orka og hugflog í, bæði hjá fyriskiparum og tykkum framsýnarum.

Eitt skulu tit vita. Býráðið sær tað sum ein heiður at verða vertur fyri Fiskivinnustevnuni, og vónandi halda tit, býurin er góður karmur um stevnuna, tí í Havn er umframt nógv annað, eisini eitt virki og fjølbroytt mentanarlív. Her er altíð okkurt at fara til.

Kære deltagere og gæster. Som borgmester i Thorshavn vil jeg ønske jer hjertelig velkommen til Thorshavn. For vores by er det en stor hæder at være ramme om North Atlantic Fish Fair 2005, og håber vi på et par gode og udbytterige dage for alle deltagerne. – God fiskerimesse.

Dear participants and guests. As mayor of Tórshavn I welcome you to the North Atlantic Fish Fair 2005. It is an honour for our city to be the host this time, and I hope that you all will have some good and profitable days here. – Good luck to you all.

Eg fari at nýta hetta høvi at takka Atlantic Fair fyri, at tit enn einaferð hava lagt til rættis eina fjølbroytta stevnu, - og á so høgum støði. At tit so hesaferð hava valt at hava stevnuna í høvuðsstaðnum fegnast vit í býráðnum um. Takk fyri samstarvið. Somuleiðis takki eg tykkum handils- og vinnufólki fyri, at tit á henda hátt royna at skapa eina vinnu og handils mentan í Føroyum.

Ynski mítt skal vera, at næstu dagarnir her á Sandvíkarhjalla fara at eydnast væl, og fari eg vegna Tórshavnar kommunu at bera fram øll góð ynski fyri North Atlantic Fish Fair 2005.

Teir næstu dagarnar eiga tit høvuðsstaðin!

Góða fiskivinnustevnu!