Heiðursnál

Á norðurlendskum fundi, sum var hildin 23.- 25. september 2005 á Holmenkollen Park Hotell í Oslo, fekk Heðin Mortensen, ÍSF forseti, hægstu heiðursnálina hjá tí danska ítróttarsambandinum, DIF.

Tað var Kai Holm, DIF forseti, sum handaði honum nálina. Til staðar vóru eisini stjórnarlimir frá DIF.

Tað var í vár, tá Heðin Mortensen hevði 25 ára starvsdag í ÍSF, at nevndin í DIF gjørdi av at lata honum hesa heiðursnál.

Á myndini eru f.v.
Heðin Mortensen og Kaj Holm

Á myndini eru f.v.
Jesper Frigast Larsen, Heðin Mortensen, Karl Christian Koch og Kai Holm

Hesi vóru á fundi vegna Føroyar á Nordisk Møde
tann 23-25. september 2005 á Holmenkollen í Oslo

Føroysku luttakararnir
Frá vinstru framman:
Sofus Johannesen, Jóhannes Joensen, Heðin Mortensen og Sølvi R. Hansen

Vinstra aftan:
Pætur Clementsen, Ninna R. Ørvarodd og Paula Eikholm

------------------------------------

Heðin Mortensen heiðraður av danska ítróttarsambandinum

ÍSF-forsetin fær heiðurstekin frá DIF fyri síni stóru avrik ítróttinum at frama síðstu 25 árini. - Hetta er ein sera stórur heiður, ið ikki bert er tað fyri meg, men fyrst og fremst føroyskan ítrótt, sigur Heðin Mortensen.

Danska ítróttarsambandið, DIF, hevur heiðrað ÍSF-forsetan Heðin Mortensen við hægstu viðurkenning fyri hansara drúgva virki fyri føroyskan og norðurlendskan ítrótt.

Heiðursteknið, ið bert verður latið fáum fólkum og sera sjáldan útlendingum, verður latin við eini heilsan frá DIF-formanninum, Kaj Holm, sum sigur Heðin Mortensen síni 25 ár sum ÍSF-forseti hava verið sera sjónskan í ikki bara ítrótti, men eisini vinnulívi og politikki í Føroyum.

- Persónliga havi eg kent Heðin sum ein dugnaligan ítróttarleiðara, ið øðrumegin arbeiðir fyri at gera vart við Føroyar sum sjálvstøðuga ítróttartjóð, men sum hinumegin bæði politiskt og ítróttarliga gongur inn fyri samstarvi, politiskt innan fyri ríkisfelagsskapin og ítróttarliga á norðurlendskum og europeiskum stigi, umframt at arbeiði hansara fyri Føroyum sum limalandi í olympiskum høpi hevur verið eitt hjartamál, sigur Kaj Holm í sambandi við viðurkenningina.

Sambært viðtøkurnar hjá DIF verður heiðursteknið latið donskum ríkisborgarum, sum hava veitt donskum ítrótti serligar og týðandi tænastur, og útlendingum, sum ynski í serligum førum er um at heiðra sum tøkk fyri ítróttarlig avrik, ið hava havt størsta týdning fyri danskan ítrótt.

- Eftir hesum er Heðin Mortensen, hóast "danskur ríkisborgari", fyrst og fremst at rokna millum útlendingarnar, við tað at føroyska ítróttarsambandið verður javnmett við eitt "útlendskt" ítróttarsamband, sigur DIF-formaðurin.
Ætlanin hjá Kaj Holm var at handa Heðini Mortensen heiðursteknið á aðalfundinum hjá ÍSF, sum verður tann 21. mai, men av tí at tað ikki liggur fyri hjá honum at koma til Føroya tá, ætlar hann at finna annað hóskandi høvi, so sum á onkrum norðurlendskum fundi í ítróttarhøpi seinni í ár.

- Hetta er ein sera stórur heiður, ið ikki bert er tað fyri meg, men fyrst og fremst føroyskan ítrótt, sigur Heðin Mortensen, ið tann 1. mars kundi hátíðarhalda, at hann í samfull 25 ár hevur sitið við róðri í føroyskum ítrótti sum forseti í Ítróttarsambandi Føroya.