Rennibreyt á Hálsi

Skipanarætlan fyri rennibreyt á Hálsi

Lýsing av málinum, samandráttur.
Býarskipanardeildin hevur, vísandi til mentamálanevndarsamtyktina dagfest 24. juni 2003, og samtyktina í byggi-og býarskipannevndini j. nr. 9902090-1, gjørt skipanarætlan fyri økið á Hálsi har ein rennibreyt er staðsett.

Býarskipanardeildin hevur latið ráðgevaravirkið Verkfrøngarstovan gera eina leiðbeinandi kostnaðarmeting uppá hvat undirlendisarbeiðið kemur at kosta um so er at breytin verður staðsett eftir hesum leisti.

Uppskotið skipar økið við einari rennibreyt við 8 geirum og einum fótbóltsvølli inni í miðjuni.
Øki er lagt av til parkering og møguligar bygging til virksemið.

Skipanarætlanin leggur upp til at ásetingarnar fyri fyri økið skulu broytast frá at vera C2 – opin miðstaðarbygging til at verða D2 ítróttarøki fyri tað økið har rennibreyting liggur.

Somuleiðis er tað ein fortreyt fyri ætlanina, at kommunan ognar sær uml. 4000 m2 frá matr.nr. 1393 – ogn hjá Føroya Sparikassa. Hetta kann fremjast annað hvørt við vanligum keypi gjørnum frábýti, ella sum makaskifti við part av matr.nr. 1395 – ogn hjá Tórshavnar kommunu.

Ein slík rennibreyt við einum fótbóltsvølli í miðjuni hevði verið eitt skilagott uppískoyti til Gundadal og á Hálsi sum ítrottarøkið.

Mentamálanevndin 24. juni 2003: Samtykt at heita á plandeildina um at arbeiða víðari við málinum og at leggja málið fyri nevndina aftur.

Tilmæli:
Tekniski stjórin og býararkitekturin mæla til at nevndin góðkennir skipanarætlanina, soleiðis at arbeiðast kann víðari við málinum at leggja fyri nevndina aftur.

Tilmæli:
Deildarleiðarin í mentamálum mælir til at arbeitt verður víðari við málinum, og at ein byggiskrá verður gjørd fyri verkætlanina.

Mentamálanevndin 31. mars 2004: Samtykt at umsitingin ger ein skrivligan arbeiðssetning at leggja fyri nevndina.

Mentamálanevndin 21. apríl 2004: Samtykt at arbeiðssetningurin verður soljóðandi:

Arbeiðssetningur

Arbeiðsbólkur verður settur at gera eina byggiskrá til ger av rennubreyt við tilhoyrandi økjum og útgerð í Tórshavnar kommunu.

Byggiskráin skal m.a. innihalda:

Skipanarætlan fyri økið á Hálsi, sambært j. nr. 9902090-1, sum plandeildin hevur gjørt, herundir:
- Stødd, plasering o.a.
- Uttanduraøki
- Hølisskrá
- Atkomuviðurskifti
- Útbyggingarmøguleikar

Ognarviðurskifti

Tíðarætlan

Leiðbeinandi kostnaðarmeting, býtt sundir í:
- Undirlendisarbeiðið
- Breyt við 8 geirum
- Miðøki við einum fótbóltsvølli
- Uttanumøki, atkoma, parkering og møguligar bygging til ymiskt virksemið, t.d. gistingarhús.
- Møguliga atkoma til verandi stadionøki

Bólkurin eigur eisini at hava fyrilit fyri myndugleikakrøvum og øðrum viðurskiftum, soleiðis at hesi verða lýst, nevnast kann m.a.:
- at byggisamtyktini skal broytast frá at vera C2 – opin miðstaðarbygging til at verða D2 ítróttarøki.
- at kommunan má ogna sær uml. 4000 m2 frá matr.nr. 1393 – ogn hjá Føroya Sparikassa.
- at vegatgongd til grannaognir skulu fáast upp á pláss

Afturat omanfyri nevnda, skal bólkurin gera stutta lýsing av møguleikunum at gera rennubreyt í Hoydølum og í samband við eitt møguligt nýtt ítróttarøki í Hoyvíkshaganum í staðin fyri á Hálsi. Í hesum sambandi verður víst til, at stórar útbyggingar fara fram í Hoyvíkshaganum og Heildarætlanin hjá kommununi leggur upp til, at Hoyvíkshagin verður útbygdur, soleiðis at har koma at búgva uml. 6.000 fólk.

Byggiskráin skal leggjast fyri mentamálanevndina í seinasta lagi 30. juni 2004.

Eisini samtykt at arbeiðsbólkurin hevur 3 limir:
1 umboð fyri Trivnaðarfyrisitingina, sum verður formaður
1 umboð fyri Teknisku fyrisitingina og
1 umboð fyri Sersamband fyri frælsan ítrótt
og at játta kr. 200.000 av konto 64 til byggiskránna.