Heðin Mortensen: 58.
ST-aðalfundurin í New York
Ferðin úr Keypmannahavn til New York mánadagin
22. september gekk væl. Danski konsulin í New
York og 2 fólk frá donsku ST-sendistovuni
tóku væl ímóti okkum í
Newark floghavnini og koyrdu okkum til hotellið. Hotellið
liggur á East 34th Street, og búgva vit á
35. hædd við stórslignum útsýni
yvir býin. Komin á hotellið, var skjótt
gjørt av, tí vit skuldu oman til ST-skrivstouna
fyri at fáa serlig atgongumerki beinanvegin. Hetta
tí, at so fingu vit høvi til at vera hjástødd
í týsmorgunin, tá sjálvt orðaskiftið
á ST-aðalfundinum byrjaði.
Fyrsti røðari var Kofi Annan
og næsti røðari var George W. Bush, forseti.
Sera áhugavert var at lýða á og
eygleiða so mætar menn, og sum væntað
varð nógv tosað um støðuna í
Iraq, men ikki kann sigast, at Bush bað orsakað
um støðuna har. Hann bað hinvegin um altjóðan
stuðul og pening til at fáa demokrati í
Iraq at rigga og frælsið til fólkið
har.
Hann segði m.a., at fyri at fáa
frið í heimin, máttu arabisku tjóðirnar
halda uppat at fíggja terroristiskum felagskapum.
USA gongur á odda fyri at hjálpa neyðstøddum
kring heimin, eitt nú teimum, sum svølta,
og ørgrynna av peningi verður latin fyri at basa
aids, eins og UNICEF fær nógvan pening til
at hjálpa børnum kring allan heim, sum hava
polio og tuberklar.
Trygdin er sum vera man sera strong
til ein slíkan ST-aðalfund, bæði innan
og uttanfyri bygningin, og má eftirlitið sigast
at vera strangari enn í nakrari floghavn. Har vóru
eisini ógvuliga nógv fólk til staðar,
høllin, sum rúmar eini 3000 fólk, var
fullsett av luttakarum úr øllum heiminum.
Politi í hópatali er somuleiðis at síggja
um allan býin,
Á donsku ST-sendistovuni verður
nógv tilfar handað okkum, sum eru har, og ber
til at fylga væl við í øllum sum
fyriferst á aðalfundinum.
Veðrið hevur verið skiftandi
hesar báðar dagarnar, tá vit lendu var
sera gott, lýtt eini 22 stig, men fyrrapartin týsdagin
regnaði av grimd. Tað sleyt í út á
dagin, og tá var farið í býin at
spáka, og m.a. vitjaðu vit staðið á
World Trade Center, har Twin Towers stóðu. Ein
trist sjón.
Mikudagin verður fundur við
danska uttanríkisráðharran, Per Stig Møller,
sum á aðalfundinum seinni um dagin skal leggja
fram sjónarmiðið hjá donsku stjornini.
Heðin Mortensen
løgtingslimur
|
